Azərbaycan millisi 2015-ci ilə Avropanın sonuncusu kimi qədəm qoyur. Avropa çempionatının seçmə mərhələsində bütün qitədə xal qazanmayan cəmi üç komanda var – Azərbaycan, Andorra və Cəbəllütariq. 2015-ci il Azərbaycan üçün olduqca önəmli ildi. Həm idman, həm də siyasi baxımdan önəmli il. 2015-ci ildə Bakıda 1-ci Avropa oyunları keçiriləcək. 2015-ci ildə Azərbaycan prezidenti İlham Əliyevin 2005-ci ildə imzaladağı Dövlət Proqramının icra müddəti də başa çatır. 10 illik proqramın. Futbolun inkişafını təmin etməli olan Dövlət Proqramının. 2015-ci ilə – proqramın icra müddətinin başa çatdığı ilə Azərbaycan millisi Avropa sonuncusu kimi qədəm qoyur.
Deməli, bu proqram icra olunmayıb. Mümkün deyil, proqram çərçivəsində ən azı 30 faiz iş görülsəydi, Azərbaycan sonuncu olmazdı Avropada. Görülməyib. Görülməyibsə, deməli, cənab Prezident aldadılıb. Əslində, bunun izahı “aldadılıb” yox, “xəyanətdi”. Prezidentə xəyanət, Azərbaycana xəyanət.
2015-ci ilə Azərbaycan Premyer Liqası cəmisi 9 komanda ilə qədəm qoyur. Bir tərəfdən deyilir ki, ölkədə böyük iqtisadi inkişaf var, digər tərəfdən isə Azərbaycan çempionatında oynamağa komanda tapılmır. “Araz Naxçıvan”ın maliyyə durumuna görə çempionatı tərk etdiyini iddia etmək absurd olardı. Deməli, ortada başqa səbəblər var. Səbəblər var ki, hətta hakimiyyətin yuxarı dairələrində söz sahibi olan şəxslər belə futbola yatırım qoymaqdan imtina edirlər. Belə situasiyanı yaradan şəxslər sözsüz ki, Azərbaycan futbolunun içindədi, onlar AFFA-da oturublar.
Bəs kimdi onlar?
AFFA prezidenti Rövnəq Abdullayev 7 ildi ki, Azərbaycan futboluna rəhbərlik edir. İnandığı, güvəndiyi komanda ilə. Dövlət Proqramının icra müddətində Azərbaycan futboluna demək olar ki, Rövnəq Abdullayev rəhbərlik edib. Berti Foqtsun 7 illik milli sərgüzəşti də məhz Rövnəq Abdullayevin və onun komandasının təşəbbüsüylə gerçəkləşib.
Berti Foqts Azərbaycandan gedib. Ancaq 7 illik biabırçılığa görə kimsə cavab vermək istəmir. İndi Rövnəq Abdullayevin komandasında olanlar günahı bir-birinin üzərinə atır. AFFA prezidentinə yaxın şəxslər bütün günahı Abdullayevin iki vəzifədə “sağdiş”i olan Elşad Nəsirovda görürlər. Həm ARDNŞ-də, həm də AFFA-da vitse-prezident vəzifəsini tutan bu şəxsin AFFA-nın baş katibi Elxan Məmmədovla birləşərək Rövnəq Abdullayevə badalaq vurduğu bildirilir.
Öz növbəsində Elxan Məmmədov da Foqts dönəminə görə Rövnəq Abdullayevi günahlandırır. Baş katib mətbuata verdiyi açıqlamada açıq şəkildə bildirib ki, millinin baş məşqçi postuna namizədləri AFFA-nın İcraiyyə Komitəsinin üzvləri irəli sürür və təsdiq edir. İcraiyyə Komitəsi isə demək olar ki, Rövnəq Abdullayevin adamlarından formalaşıb. Elxan Məmmədov bu məsələni qabartmaqla “deyək ki, namizədi biz vermişik, bəs nədən Rövnəq Abdullayevin adamları onu yekdilliklə baş məşqçi postuna təsdiqləyirdilər” sualını vermiş olub. Haqlı da sualdı. Elə bütün Azərbaycan Berti Foqtsdan dad edən zaman Rövnəq Abdullayev “mən Foqtsun işindən razıyam” deməklə, Azərbaycana dağ çəkmirdimi?
Deməli, bü gün də hesabatı Berti Foqtsun işindən razı olan adam – AFFA prezidenti verməlidi. Komandası ilə birgə. Bu, elə-belə hesabat deyil. Bu, prezidentə, Azərbaycana qarşı xəyanətin hesabatıdı.
Bu xəyanətin hesabatını verəcək şəxslər isə bunlardı:
Rövnəq Abdullayev – AFFA prezidenti
Elşad Nəsirov – AFFA-nın vitse-prezidenti, İcraiyyə Komitəsinin üzvü
Rauf Əliyev – AFFA-nın vitse-prezidenti, İcraiyyə Komitəsinin üzvü
Elxan Məmmədov – AFFA-nın baş katibi.
Hafiz Məmmədov – İcraiyyə Komitəsinin üzvü
Kazbek Tuayev – İcraiyyə Komitəsinin üzvü
Cahangir Hacıyev – İcraiyyə Komitəsinin üzvü
İskəndər Cavadov – İcraiyyə Komitəsinin üzvü
Mahir Məmmədov – İcraiyyə Komitəsinin üzvü
Mirkamil Rəhimov – İcraiyyə Komitəsinin üzvü
Elmar Qasımov – İcraiyyə Komitəsinin üzvü.
komanda.az
Fikirlərini bizimlə bölüş!