Statistika sizi dəhşətə gətirəcək. Klub futbolunda çox ciddi problemlər var. Milli komandalarımızın zəif çıxışının bir səbəbi də elə bu məqamda gizlənir.
Ölkədə uşaq futbolunun durumu, yeni nəslin hazırlanmaması, AFFA-nın, klubların bu sahəyə biganə münasibətinin nəticəsidi ki, komandalarda orta yaş həddi həddindən artıq yuxarıdı. Qocalar yığınının bir neçə ildən sonra karyerasını bitirməyə məcbur olacağını nəzərə alsaq, faktiki oynatmaq üçün futbolçu tapılmayacaq. İstedadlı gənclər ya yoxdu, ya güvənilmir, belədə çox böyük uçurum yaranıb. Hazırda 30-32 yaşı olanlarla limit məcburiyyətinə görə oynadılan 20-22 yaşlılar arasında böyük boşluq var – klublarda 22-30 yaş aralığında müntəzəm forma geyən 30-35 nəfər tapmaq olmur.
AFFA sistemin düzgün qurulmaması üzündən, təbii ki, əsas günahkardı. Lakin klublar da sabahı üçün ciddi iş görməyib. Əksər klublar hazır futbolçu axtarışına çıxır və hazırda belələri də azdı. “Qəbələ” futbol akademiyasından başqa heç kim oyunçu hazırlığına diqqət etmir, bu klun da yetirmələrini icarəyə göndərir, özü isə veteranlar güvənir. Bir sıra uşaq məktəbləri işləyir, klublar isə öz yetirmələrini üzə çıxarmaq üçün özünü əziyyətə salmır və bu məktəblərdən, müxtəlif qruplardan faydalanır.
Klublarımızın heyətini araşdırıb, onların orta yaş həddini müəyyənləşdirməyə çalışdıq. Bəri başdan yazaq ki, hazırda adı iştirak ərizəsində olan və ən azı 1 matçda forma geyənləri siyahıya saldıq. Çünki elə komandalar var ki, çoxlu gənc sifariş verib, lakin onları meydana buraxmayıb.
Eyni zamanda qışdan əvvəl klublarda olan, indi isə başqa komandaya keçənləri ikincilərin heyətində nəzərə aldıq. Ümumiyyətlə, ölkəmizi tərk edənlər statistikada qeyd edilməyib.
Beləliklə, komandalarda orta yaş həddi belədi:
Qəbələ – 27,73
Qarabağ – 27,47
Keşlə – 27,19
Neftçi – 26,75
Səbail – 26,30
Zirə – 26,24
Sabah – 26,05
Sumqayıt – 25,26
Ümimilikdə Premyer Liqanın orta yaş həddi 26,62-di. Amma bu rəqəm də aldadıcıdı. Təsəvvür edin, AFFA 1996-cı il təvəllüdlü və daha gənc bir oyunçunun mütləq start heyətində olması tələbini qoymasaydı, vəziyyət necə olardı? Hər klub məcbur qalıb 3-4 belə oyunçunu iştirak ərizəsinə salıb və onların da ən azı biri meydana çıxıb. Bu futbolçular oynamasaydı, Premyer Liqada orta yaş həddi 29-30 arasında olardı.
Real durumu təsəvvür etmək üçün müqayisəyə ehtiyac var. Və bu məqamda sıradan çempionatı və klubları deyil, nəticə üçün oynayanları göz önünə gətirək. Çempionlar Liqasının yarımfinalçısı olan “Ayaks”da heyətin orta yaş həddi 23,90-dı. “Tottenhem”də bu rəqəm 24-ü, “Liverpul”da 25-i keçmir. Əlavə şərhə ehtiyac varmı?
Bu rəqəmlər göstərir ki, klublar gənclərə güvənmir, yetişdirmir, şans vermir. Statistikaya “Qəbələ” kimi akademiyası olan komandanın başçılıq etməsi isə utancvericidi.
Komandalarda legionerlərin orta yaş həddi də həddən artıq yüksəkdi. Düzdü, bunun bir səbəbi cavan əcnəbilərin ölkəmizə gəlməyə həvəs göstərməməsidi. Amma bu da heç kimə veteran yığınına qucaq açmağa əsas vermir. Yaşı 30-dan çox olan legionerlərin sayı “Qarabağ” 5, “Neftçi” 5, “Keşlə” 5 və “Səbail”də 5, “Zirə”, “Qəbələ” və “Sabah”da 3-dü.
Maykl Essyen 36 yaşla Premyer Liqanın rekordçusudu. Yerlilərdən yalnız Rəşad Sadıqov onunla eyni yaşdadı. “Qarabağ”ın kapitanının komandasının lideri olduğunu nəzərə alsaq, yəqin ki, “Səbail”in əcnəbisi 40-ı çoxdan haqlayıb. Afrikalılara xas süni yaşazaltmalının qanalıdan da yan ötmədiyini fiziki durumu da isbatlayır.
Beləliklə, legionerlərin orta yaş həddi:
Sabah – 30,80
Keşlə – 29,66
Qarabağ – 29,45
Səbail – 28,81
Neftçi – 28,77
Qəbələ – 28,71
Zirə – 28,09
Sumqayıt – yoxdu
35 yaşlı Marko Deviç “Sabah”ın siyahıya başçılıq etməsi üçün kifayət edib. Bu komandada 34, 31 və 2 27 yaşlı əcnəbi də var. Artıq vidalaşan Miloş Bosançiç siyahıda nəzərə alınmayıb – onun da 30 yaşı var idi. Gələcəyin komandası belə qurulmamalıdı.
“Keşlə”nin ikinci pillədə olması aldadıcıdı. Əslində, bu komanda hamıdan qocadı. Qışda göndərilən bəzi əcnəbiləri də nəzərə alsaq, vəziyyət daha faciəvi olardı. Azərbaycanlı olan, amma ölkəmizdə Rusiya vətəndaşı kimi oynayan 23 yaşlı Samir Məsimovu nəzərə almayanda legionerlərin orta yaş həddi 30,50-yə yüksəlir. Bu, komandanı quranların, heyəti komplektləşdirənlərin necə məsuliyyətsiz olduğunu göstərir. “Keşlə”nin son pillədə olmasının əsas səbəbi də elə budur. Komanda Premyer Liqada qalsa, yayda heyət tamamilə təmizlənməlidi.
Siyahı 2 ay əvvəl hazırlansaydı, “Qarabağ” ikinci pillədə olardı. Mövsümün ikinci yarısı başlayandan sonra 36 yaşlı Ansi Aqolli və 35 yaşını tamam etmiş Hannes Halldorsson yola salınıb. Onlar statistikada nəzərə alınsaydı, ağdamlılar bu göstəricidə 30,38-lə seçilərdi. Ümumiyyətlə, Qurban Qurbanovun sərəncamında qoca armada var və yayda ciddi islahatlar aparılmasa, avrokuboklarda dinamikaya dözməyən, piyada gəzən futbolçuları görəcəyik.
Fikirlərini bizimlə bölüş!